ఢిల్లీలో అతి భారీ వర్షాలు : నీట మునిగిన రహదారులు పలు కాలనీలు జలమయం

ఢిల్లీ నగరం జలమయమైంది. ఇవాళ ఉదయం కురిసిన అతి భారీ వర్షానికి రోడ్లు జలమయమయ్యాయి. కాలనీలు నీట మునిగాయి. రవాణాకు తీవ్ర అంతరాయం ఏర్పడింది. ఆశ్రం అండర్ బ్రిడ్జి వద్ద ఆరడుగుల వరద నీరు చేరింది. రాకపోకలు నిలిచిపోయాయి. మింటో రోడ్డులో వాహనాలు వరదలో మునిగిపోయాయి.

ఇవాళ ఉదయం నుంచి ఢిల్లీలోని అన్ని ప్రాంతాలు సహా, ఎన్‌సీఆర్ ప్రాంతంలోనూ భారీ నుంచి అతి భారీ వర్షాలు నమోదయ్యాయి. మరో 24 గంటలు వర్షాలు కురిసే అవకాశ ముందని ఐఎండి హెచ్చరించింది.రాబోయే 24 గంటల్లో ఉత్తరాఖండ్‌లోని కొన్ని ప్రాంతాల్లో అత్యంత భారీ వర్షాలు, జమ్ము కశ్మీర్, ఉత్తరప్రదేశ్,హిమాచల్‌ప్రదేశ్ రాష్ట్రాల్లో పిడుగులతో కూడిన భారీ వర్షాలు నమోదవుతాయని భారత వాతావరణ శాఖ వెల్లడించింది.