పశ్చిమబెంగాల్ రాజధాని కోల్‌కతాలో ఆర్జీ కార్ మెడికల్ హాస్పటల్‌లో జూనియర్ డాక్టర్‌పై అత్యాచారం, హత్య ఘటన దేశ వ్యాప్త ఆందోళనకు దారితీసింది. జూనియర్ డాక్టర్లకు రక్షణ లేకుండా పోయిందంటూ దేశ వ్యాప్తంగా డాక్టర్లు విధులు బహిష్కరించి నిరసన తెలిపారు. ఈ ఘటన బెంగాల్‌ను కుదిపేస్తోంది. ఘటనపై సీఎం మమతా బెనర్జీ మరోసారి స్పందించారు. ఆదివారంకల్లా కేసు తేల్చకపోతే సీబీఐకి అప్పగిస్తానంటూ సీఎం పోలీసులను హెచ్చరించారు.
కోల్‌కతా ఆర్జీ కార్ మెడికల్ హాస్పటల్‌లో గత శుక్రవారం రాత్రి విధుల్లో ఉన్న జూనియర్ డాక్టర్‌పై అత్యాచారం హత్యకు పాల్పడిన విషయం తెలిసిందే. ఈ కేసులో ఇప్పటికే సంజయ్‌ అనే అనుమానితుడిని పోలీసులు అరెస్ట్ చేశారు. సీసీ టీవీ ఫుటేజీ ఆధారంగా నిందితుడిని అదుపులోకి తీసుకుని పోలీసులు విచారణ జరుపుతున్నారు.
