దేశ రాజధాని ఢిల్లీలో కీలక ఐసిస్ ఉగ్రవాదిని ఎన్ఐఏ అరెస్ట్ చేసింది. ఢిల్లీలోని దర్యాగంజ్ నివాసి రిజ్వాన్ అబ్దుల్ హజీ అలీ తుగ్లకాబాద్ బయోడైవర్సీటీ పార్కు వద్దకు వస్తున్నాడనే పక్కా సమాచారంతో ఎన్ఐఏ అలర్ట్ అయింది. గురువారం రాత్రి 11 గంటల సమయంలో రిజ్వాన్ పార్కు వద్దకు రాగానే ఎన్ఐఏ చుట్టుముట్టింది. అతని వద్ద నుంచి పిస్టల్, మందుగుండు సామగ్రి, రెండు మొబైల్ ఫోన్లు స్వాధీనం చేసుకున్నారు. రిజ్వాన్ ఐసిస్ పుణే మాడ్యూల్‌లో చాలా కీలకంగా ఉన్నట్లు పోలీసులు తెలిపారు. ఇతనిపై ఇప్పటికే రూ.3 లక్షల రివార్డు కూడా ఉంది.
పంద్రాగష్టు వేడుకల వేళ రాజధాని ఢిల్లీలో పలువురు ప్రముఖుల ఇళ్ల వద్ద రిజ్వాన్ రెక్కీ నిర్వహించినట్లు పోలీసులు గుర్తించారు. పక్కా సమాచారంతో ఎన్ఐఏ కూడా రంగంలోకి దిగింది. ఢిల్లీ పోలీసులు, ఎన్ఐఏ రిజ్వాన్‌ను గురువారం రాత్రి అదుపులోకి తీసుకున్నారు. ఉగ్రకదలికల నేపథ్యంలో ఢిల్లీలో భద్రతను పెంచారు.
