సజీవంగా ఓ యువకుడిని నలుగురు వ్యక్తులు పాతిపెట్టారు. అయితే అతడిని వీధి కుక్కలు కాపాడాయి. ఈ విచిత్ర ఘటన ఆగ్రాలో చోటుచేసుకుంది.ఉత్తరప్రదేశ్‌లోని ఆగ్రాకు చెందిన 24 ఏళ్ళ రూప్ కిశోర్‌పై జూలై 18న అర్టోని ప్రాంతంలో నలుగురు వ్యక్తులు దాడికి పాల్పడ్డారు. అనంతరం అతడు స్పృహ తప్పి పడిపోయాడు. రూప్ కిశోర్ చనిపోయాడని భావించిన సదరు దుండగులు దేహాన్ని ఓ ప్రాంతంలో పాతిపెట్టారు.
ఆ ప్రాంతంలో సంచరించే వీధి కుక్కలు అక్కడ మట్టి తవ్వాయి. అనంతరం యువకుడి శరీరాన్ని కొరకడంతో స్పృహలోకి వచ్చాడు. దీంతో అతడు స్థానికుల వద్దకు వెళ్లి పరిస్థితిని వివరించడంతో వెంటనే ఆసుపత్రిలో చేర్పించారు.
తన కుమారుడిని నలుగురు వ్యక్తులు బలవంతంగా తీసుకెళ్లి దాడి చేశారని బాధితుడి తల్లి చెబుతోంది. ఘటనపై కేసు నమోదు చేసిన పోలీసులు దాడికి పాల్పడిన వారి కోసం గాలిస్తున్నారు.
