భారతదేశపు ప్రముఖ షట్లర్ పివి సింధు పారిస్ ఒలింపిక్స్‌లో గ్రూప్ స్టేజ్‌లో రెండో మ్యాచ్‌లో అలవోక విజయం సాధించింది. బ్యాడ్మింటన్ మహిళల సింగిల్స్‌లో ప్రీ-క్వార్టర్‌ ఫైనల్స్‌కు చేరుకుంది.

గ్రూప్-ఎం లో ఆఖరి మ్యాచ్‌లో పీవీ సింధు ఎస్తోనియా క్రీడాకారిణి క్రిస్టీన్ కూబాతో తలపడింది. మ్యాచ్ ప్రారంభం నుంచీ సింధు స్పష్టమైన ఆధిక్యం చూపించింది. రెండో సెట్‌లో క్రిస్టీన్ కొంచెం పుంజుకున్నా, సింధు ఫామ్‌ను ఎంతమాత్రం అందుకోలేకపోయింది. కేవలం 34 నిమిషాల్లో ముగిసిపోయిన ఈ మ్యాచ్‌లో సింధు 21-5, 21-10 స్కోర్‌తో వరుసగా రెండు సెట్లలోనూ గెలిచింది.  

సింధు తర్వాత ఆడబోయే రౌండ్ ఆఫ్ సిక్స్‌టీన్ మ్యాచ్‌లో చైనా క్రీడాకారిణి హె బింగియావోతో తలపడే అవకాశం ఉంది. 2020 టోక్యో ఒలింపిక్స్‌లో సింధు, బింగియావోను  ఓడించి కాంస్యపతకం సాధించింది.