పలుమార్లు లారీలు వేసుకెళ్ళినట్లు చెబుతున్న బంధువులు
మద్యం మత్తులో ఓ వ్యక్తి విచిత్రంగా ప్రవర్తించాడు. సాధారణంగా ఎవరైనా మద్యం తాగితే నానా యాగీ చేయడంతో పాటు కొట్లాటలకు దిగుతారు. కానీ నంద్యాలలో మాత్రం ఓ వ్యక్తి ఆర్టీసీ బస్సునే అత్తారింటికి వేసుకెళ్ళాడు. పుట్టింట్లో ఉన్న తన భార్యను చూసేందుకు ఏకంగా ఆర్టీసీ అద్దె బస్సును వేసుకెళుతూ పోలీసులకు దొరికిపోయాడు. నంద్యాల జిల్లా ఆత్మకూరు మండలంలో ఈ ఘటన చోటుచేసుకుంది.
స్థానికుడైన డ్రైవర్ దరగయ్య , లారీ డ్రైవర్ గా పనిచేస్తున్నాడు. అతడి భార్య పగిడ్యాల మండలంలోని ముచ్చుమర్రిలోని పుట్టింటికి వెళ్ళింది. ఆమెను చూసేందుకు ముచ్చుమర్రి వెళదామనుకున్న దరగయ్య ఆత్మకూరు బస్‌స్టాండ్‌కు వెళ్ళాడు. ఆ సమయంలో బస్సులేమీ లేకపోవడంతో పక్కనే ఉన్న అద్దె బస్సు ఎక్కాడు. అందులో దాచి ఉంచిన తాళాలు వెతికి పట్టుకుని బస్సును వేసుకెళ్ళాడు. కాసేపటికి అక్కడికి వచ్చిన మరో డ్రైవర్ బస్సు చోరీ అయ్యిందని భావించి వాహన యజమానికి సమాచారం అందించాడు.
గాలింపు చర్యలు చేపట్టగా బస్సు నందికొట్కూరు వైపు వెళుతున్నట్టు కనిపెట్టారు. పోలీసులు చోరీ అయిన బస్సును ముచ్చుమర్రి వద్ద ఆపి దరగయ్యను అదుపులోకి తీసుకున్నారు. గతంలోనూ ఇలా మతిస్థిమితం లేని సందర్భాల్లో లారీలను వేసుకెళ్లినట్లు బంధువులు తెలిపారు.ఘటనపై బస్సు యజమాని ఫిర్యాదు చేయకపోవడంతో పోలీసులు దరగయ్యకు కౌన్సిలింగ్ నిర్వహించి పంపించారు.
