పల్నాడు జిల్లా వినుకొండలో గతరాత్రి దారుణ హత్య జరిగింది. నడిరోడ్డు మీద అందరూ చూస్తుండగానే ఒక వ్యక్తి మరో వ్యక్తిని దారుణంగా కొట్టి, కత్తితో నరికి చంపాడు. దానికి సంబంధించిన వీడియో సామాజిక మాధ్యమాల్లో వైరల్ అయింది. హతుడు వైఎస్ఆర్‌సిపికి చెందినవాడు కావడంతో ఈ వ్యవహారం రాజకీయ రంగు పులుముకుంది.
బుధవారం రాత్రి 8.30 సమయంలో వినుకొండ ప్రధాన రహదారిపై ఆ హత్య జరిగింది. షేక్ రషీద్ వైఎస్ఆర్‌సిపి యువజన విభాగం కార్యకర్త. అతన్ని షేక్ జిలానీ అనే వ్యక్తి నడిరోడ్డు మీద కత్తితో నరికి చంపాడు. ముందు రెండు చేతులనూ గాయపరిచి, తర్వాత మెడ మీద నరికి చంపాడని ప్రత్యక్ష సాక్షులు చెబుతున్నారు.
ఈ హత్య వెనుక రాజకీయ కారణాలేమీ లేవని జిల్లా ఎస్పీ కంచి శ్రీనివాసరావు స్పష్టం చేసారు. వ్యక్తిగత కక్షల వల్లనే నిందితుడు ఈ ఘాతుకానికి పాల్పడినట్లు ప్రాథమిక విచారణలో తేలిందని వివరించారు. సంఘటన జరిగిన వెంటనే వినుకొండలో నిషేధాజ్ఞలు విధించారు. పట్టణంలో శాంతిభద్రతలకు భంగం కలిగించేందుకు ప్రయత్నిస్తే కఠిన చర్యలు తీసుకుంటామని హెచ్చరించారు.
తెలుగుదేశానికి చెందిన ప్రత్యర్థే రాజకీయ కక్షతో ఆ హత్యకు పాల్పడ్డాడని వైఎస్ఆర్‌సిపి ఆరోపించింది. టిడిపి ఆ ఆరోపణలను తీవ్రంగా ఖండించింది. మృతుడు, నిందితుడు ఇద్దరూ వైసిపికి చెందినవారేననీ, అదే పార్టీకి చెందిన గూండా అనుచరులనీ ఆ పార్టీ చెబుతోంది.
జగన్‌రెడ్డి ఏపీ పరువు తీశాడు : షర్మిల…ప్రభాస్ ఎవరో నాకు తెలియదు