స్పష్టమైన యోజన, చర్చలతోనే మెరుగైన ఫలితాలు వస్తాయని విద్యాభారతి అఖిల భారతీయ ప్రచార ప్రభారీ లింగం సుధాకర్ రెడ్డి వెల్లడించారు. అందుకే విద్యా భారతి ప్రతీ సంవత్సరంలోనూ స్పష్టమైన యోజన చేపట్టేందుకు వర్షారంభ సమావేశాలు నిర్వహిస్తుందని వివరించారు. విద్యాభారతి ఆంధ్రప్రదేశ్ ప్రాంత స్థాయి వర్షారంభ సమావేశాలు 13, 14 తేదీల్లో రెండు రోజులపాటు అనంతపురం నగరంలో జరిగాయి. ఆ కార్యక్రమానికి ముఖ్య అతిథిగా విచ్చేసిన సుధాకర్ రెడ్డి మాట్లాడుతూ విద్యాభారతి దేశవ్యాప్తంగా సమగ్రమైన విద్యా వికాసం కోసం కృషి చేస్తోందని వివరించారు. మొత్తం 28 అంశాల మీద విద్యాభారతి పనిచేస్తుందని వివరణాత్మకంగా తెలియజేసారు. కుటుంబ ప్రబోధనం, సామాజిక సమరసత, పర్యావరణ పరిరక్షణ, నాగరిక కర్తవ్య బోధ, స్వ-భావన అనే ఐదు కర్తవ్యాల గురించి విస్తృతంగా చర్చ జరిగింది.
ఆంధ్రప్రదేశ్ అంతటా విద్యాభారతికి అనుబంధంగా అనేక సమితులు పనిచేస్తున్నాయి. అన్ని సమితుల నుంచి ప్రధాన ఆచార్యులు, పాఠశాల కమిటీల ప్రబంధకులు, సమితి స్థాయి నాయకులు ఈ కార్యక్రమంలో పాల్గొన్నారు. మొత్తం 350 మందికి పైగా ప్రతినిధులు రెండు రోజులపాటు, వచ్చే విద్యా సంవత్సరంలో చేపట్టాల్సిన అంశాల మీద చర్చించారు. ఈ సందర్భంగా విద్యా సామాజిక చైతన్యం అనే పుస్తకాన్ని అతిథులు ఆవిష్కరించారు. ఉద్ఘాటన సమయంలో అతిథిగా విచ్చేసిన కళ్యాణదుర్గం ఎమ్మెల్యే అమిలినేని సురేంద్రబాబు మాట్లాడుతూ .. పుస్తక పఠనంతో గొప్ప ఫలితాలు ఉంటాయని వివరించారు. విద్యార్థి దశ నుంచి పుస్తకాలు చదవడం అలవాటు చేసుకోవాలని సూచించారు.
విద్యాభారతి ఆంధ్ర ప్రదేశ్ అధ్యక్షులు, ఆంధ్ర విశ్వవిద్యాలయం పూర్వ వైస్ ఛాన్సలర్ ప్రొఫెసర్ నాగేశ్వరరావు అధ్యక్షతన రెండు రోజుల సమావేశాలు జరిగాయి. కార్యక్రమ సరళిని పర్యవేక్షిస్తూ ప్రొఫెసర్ నాగేశ్వరరావు ఎప్పటికప్పుడు మార్గదర్శనం చేశారు. పాఠ్యప్రణాళిక, విస్తరణతో పాటుగా వివిధ ఆయామ్ లకు సంబంధించిన ప్రగతిని సమీక్షించారు.
రెండు రోజుల కార్యక్రమంలో రాయలసీమ సమితి అధ్యక్షులు రామకృష్ణారెడ్డి, విద్యాభారతి ప్రాంత కార్యదర్శి ప్రతాప్ సింహ శాస్త్రి, సంఘటన మంత్రి కన్నా భాస్కర్, శైక్షణిక్ ప్రముఖ్‌లు పాల్గొన్నారు. ఆర్ఎస్ఎస్ ప్రాంత కార్యవాహ్ వేణుగోపాల్ నాయుడు ప్రతినిధులకు మార్గదర్శనం చేశారు. సమారోప్ కార్యక్రమంలో ముఖ్య అతిథిగా విచ్చేసిన క్షేత్ర కార్యదర్శి ఆయాచితుల లక్ష్మణరావు, ప్రశిక్షణా ప్రముఖ్ రావుల సూర్యనారాయణ విద్యా సంబంధిత విషయాల మీద సూచనలు చేశారు. ఈ కార్యక్రమంలో అనంతపురం సెంట్రల్ యూనివర్సిటీ వైస్ ఛాన్సలర్ ఎస్.ఎ. కొరి, అనంతలక్ష్మి ఇంజనీరింగ్ కాలేజీ చైర్మన్ అనంత రాముడు తదితరులు పాల్గొన్నారు.
