ప్రముఖ నటి రకుల్‌ప్రీత్‌సింగ్ సోదరుడు అమన్‌ప్రీత్‌సింగ్‌ను డ్రగ్స్ రవాణా కేసులో పోలీసులు అరెస్ట్ చేశారు. అమన్ వద్ద నుంచి 200 గ్రాముల కొకైన్ స్వాధీనం చేసుకున్నారు. మరో నలుగురు నైజీరియన్లను కూడా అరెస్ట్ చేశారు. గోవా, ముంబై నుంచి అక్రమంగా డ్రగ్స్ హైదరాబాద్ తీసుకుచ్చి విక్రయిస్తున్నారనే పక్కా సమాచారంతో హైదరాబాద్ సెబ్ పోలీసులు దాడులు చేసి పట్టుకున్నారు.
డ్రగ్స్ మాఫియా ముఠాలకు చెక్ పెట్టేందుకు తెలంగాణ పోలీసులు నిఘా పెంచారు. ముఖ్యంగా గోవా, ముంబై నుంచి నగరానికి చేరుతోన్న కొకైన్, ఏపీ నుంచి నగరానికి తరలిస్తోన్న గంజాయి ముఠాలపై నిఘా వేసి పట్టుకుంటున్నారు. గడచిన నెల రోజుల్లోనే మత్తు పదార్థాలు అమ్మే ఆరు ముఠాలను సైబరాబాద్ పోలీసులు అరెస్ట్ చేసి జైలుకు పంపారు.
