రేపు (ఆదివారం) టీమ్ ఇండియా మాజీ కెప్టెన్ మహేంద్రసింగ్ ధోనీ పుట్టినరోజు. ఆ సందర్భంగా కృష్ణా జిల్లా నందిగామ మండలం అంబారుపేట దగ్గర విజయవాడ-హైదరాబాద్ జాతీయ రహదారి పక్కన ధోనీ అభిమానులు తమ అభిమాన క్రీడాకారుడి వంద అడుగుల కటౌట్ ఏర్పాటు చేశారు.
ఈ కటౌట్‌ను నేషనల్ హైవే పక్కనే ఏర్పాటు చేయడంతో కేవలం గ్రామస్తులనే కాక, ఆ రహదారిపై వెళ్ళే ప్రయాణికులను సైతం ఆకట్టుకుంటోంది. అంబారుపేట ఫ్యాన్స్ ధోనీ కటౌట్‌ను గతేడాది 77 అడుగుల ఎత్తులో పెట్టారు. ఈ యేడాది ఏకంగా వంద అడుగుల కటౌట్ ఏర్పాటు చేయడం విశేషం.
ఎంఎస్ ధోనీ 1981 జులై 7న జన్మించాడు. 2004 డిసెంబర్‌లో బంగ్లాదేశ్‌తో మ్యాచ్ ద్వారా క్రికెట్ అరంగేట్రం చేసాడు. ఏడాది తరవాత టెస్ట్ క్రికెట్ రంగప్రవేశం చేసాడు. వన్డేలు, టెస్ట్ క్రికెట్‌లో భారతజట్టు ఎన్నో రికార్డులు సాధించడంలో ధోనీ కీలకపాత్ర పోషించాడు. ఐపీఎల్‌లో చెన్నై సూపర్ కింగ్స్ జట్టుకు చాలాకాలం కెప్టెన్‌గా వ్యవహరించాడు. 2014 డిసెంబర్‌లో టెస్ట్ క్రికెట్ నుంచి, 2019 ఫిబ్రవరిలో టి-20ల నుంచి, 2019 జులైలో వన్‌డే క్రికెట్ నుంచి రిటైర్మెంట్ ప్రకటించాడు.
