అంతర్జాతీయ టీ20 క్రికెట్ ఫార్మెట్ కు భారత ఆల్‌రౌండర్‌ రవీంద్ర జడేజా రిటైర్మెంట్ ప్రకటించాడు. టీ20 ప్రపంచకప్ -2024 ను కైవసం చేసుకున్న భారత జట్టులో జడేజా సభ్యుడిగా ఉన్నాడు.
2009లో శ్రీలంకపై మ్యాచ్ తో అరంగేట్రం చేసిన జడేజా ఇప్పటివరకు 74 టీ20 మ్యాచ్‌లు ఆడి 515 పరుగులు చేయడంతో పాటు 54 వికెట్లు పడగొట్టాడు.
తాను మనస్ఫూర్తిగా అంతర్జాతీయ టీ20లకు వీడ్కోలు పలుకుతున్నట్లు తెలిపాడు. ఎల్లప్పుడూ దేశం కోసం శక్తిమేరకు అత్యుత్తమ ప్రదర్శన చేసినట్లు పేర్కొన్నాడు. టీ20 ప్రపంచకప్‌ను గెలవాలనే తన స్వప్నం నిజమైందన్నారు. తనకు మద్దతుగా నిలిచిన అభిమానులకు ధన్యవాదాలు తెలుపుతూ తన ఇన్‌స్టా ఖాతాలో వరల్డ్ కప్‌ ట్రోఫీని పట్టుకుని దిగిన ఫొటోని షేర్ చేశాడు.
2024 టీ20 ప్రపంచకప్ ఫైనల్‌ మ్యాచ్ ముగిసిన వెంటనే భారత స్టార్‌ క్రికెటర్లు రోహిత్‌ శర్మ, విరాట్‌ కోహ్లీ కూడా అంతర్జాతీయ టీ20 క్రికెట్ కు రిటైర్మెంట్ ప్రకటించారు.
