ఢిల్లీలో చోటుచేసుకున్న ఓ అగ్ని ప్రమాదంలో ఓ కుటుంబంలోని నలుగురు వ్యక్తులు చనిపోయారు. ఈ ఘటన ఉత్తర ఢిల్లీలోని ప్రేమ్ నగర్ ప్రాంతంలో చోటు చేసుకుంది. అగ్నిమాపక అధికారులు తెలిపిన వివరాల ప్రకారం. ప్రేమ్ నగర్‌లో తెల్లవారుజామున 3గంటల 30 నిమిషాలకు ఓ ఇంట్లో నుంచి పొగలు వస్తున్నట్లు అగ్నిమాపక సిబ్బందికి ఫోన్ వచ్చింది. వెంటనే రెండు అగ్నిమాపక శకటాలను పంపినట్లు అధికారులు తెలిపారు.తలుపులు పగలగొట్టి చూడగా నలుగురు కుటుంబ సభ్యులు అపస్మారక స్థితిలో కనిపించారు. మంటలను ఆర్పివేసి వారిని సమీపంలోని రావు తులారాం మెమోరియల్ హాస్పటల్‌కు తరలించారు. అప్పటికే వారు చనిపోయినట్లు డాక్టర్లు ప్రకటించారు.
ఇంట్లోని ఇన్వర్టర్ నుంచి చెలరేగిన మంటలు సోఫాకు అంటుకున్నాయని, దాని వల్ల వచ్చిన పొగతో ఊపిరాడక నలుగురు చనిపోయినట్లు అగ్నిమాపక సిబ్బంది తెలిపారు.
