కారులో ప్రయాణిస్తోన్న వారిపై పెద్దపులి దాడి చేసింది. ఈ ఘటన నెల్లూరు జిల్లా
మర్రిపాడు మండలం కదిరినాయుడుపల్లె సమీపంలోని ముంబై జాతీయ రహదారిపై జరిగింది. ఈ దాడిలో ప్రయాణీకులు చాకచక్యంగా తప్పించుకున్నారు. కారులో ప్రయాణిస్తోన్న తమపై పెద్దపులి పంజా విసిరిందని కారును వేగంగా పోనీయడంతో ప్రమాదం తప్పిందని ప్రయాణీకులు చెప్పారు.
మర్రిపాడు మండలంలో పెద్దపులి సంచారం స్థానిక ప్రజల్లో ఆందోళన కలిగించింది. అటవీ అధికారులకు సమాచారం ఇవ్వడంతో వారు పెద్దపులి ఆనవాళ్ల కోసం వెతుకుతున్నారు. నల్లమల అడవి నుంచి మర్రిపాడు వైపు పెద్దపులి వచ్చి ఉండవచ్చని అధికారులు చెబుతున్నారు. రాత్రిపూట సంచారం చేయవద్దని సూచించారు.
