మీడియా దిగ్గజం, ఈనాడు గ్రూపు సంస్థల అధినేత రామోజీరావు అంత్యక్రియలు హైదరాబాద్‌లోని రామోజీ ఫిల్మ్‌సిటీలో అశృనయనాల మధ్య ముగిశాయి. వేలాది మంది అభిమానులు ఆయన అంత్యక్రియల్లో పాల్గొన్నారు. ముందుగా రామోజీ ఫిల్మ్‌సిటీలోని ఆయన నివాసం నుంచి స్మృతివనం వరకు అంతిమయాత్ర కొనసాగింది. టీడీపీ అధినేత చంద్రబాబునాయుడు, తెలంగాణ బీజేపీ సీనియర్ నేతలు కిషన్‌రెడ్డి, బండి సంజయ్ సహా వేలాది మంది ప్రముఖులు అంత్యక్రియల్లో పాల్గొన్నారు.
గుండె సమస్యతో హైదరాబాద్‌లోని స్టార్ ఆసుపత్రిలో శుక్రవారంనాడు రామోజీరావు కన్నుమూసిన సంగతి తెలిసిందే. మీడియా సహా అనేక రంగాల్లో చెరగని ముద్రవేసిన రామోజీరావు పార్థీవదేహాన్ని అంతమ దర్శనం చేసుకునేందుకు తెలుగు రాష్ట్రాలతోపాటు దేశంలోని వివిధ ప్రాంతాల నుంచి ప్రముఖులు తరలివచ్చారు. తెలంగాణ ప్రభుత్వం అధికార లాంఛనాలతో ఆయన అంత్యక్రియలకు ఏర్పాట్లు చేసింది. రామోజీరావు అంత్యక్రియలకు ముందే స్మృతివనం పేరుతో స్మశానవాటిక నిర్మించుకోవడం ఆయన ముందు చూపునకు నిదర్శనంగా పలువురు కొనియాడారు.
