కర్నూలులో దారుణం జరిగింది. ముగ్గురు ట్రాన్స్‌జెండర్లు అనుమానాస్పదస్థితిలో మృతి చెందడం స్థానికంగా కలకలం రేపింది.
కర్నూలు సమీపంలోని గార్గేయపురం చెరువు వద్ద ఈ ఘటన ఆదివారం వెలుగులోకి వచ్చింది. స్థానికుల సమాచారం మేరకు సంఘటనా స్థలానికి చేరుకున్న పోలీసులు కేసు నమోదు చేసి దర్యాప్తు చేపట్టారు. మృతులు ఎవరు? ఎలా చనిపోయారు? అనేది తేలాల్సి ఉంది.
శవ పంచనామా కోసం మృతదేహాలను ప్రభుత్వాస్పత్రికి తరలించారు. వేర్వేరు ప్రాంతాలకు చెందిన ట్రాన్స్‌జెండర్లను పిలిపించి మృతదేహాలను గుర్తుపట్టేందుకు ప్రయత్నిస్తున్నారు. చనిపోయిన వారి శరీరంపై ఎలాంటి గాయాలు లేకపోవడం పలు అనుమానాలకు తావిస్తోంది.
