పుంగనూరు బరిలో గెలుపుగిత్త పెద్దిరెడ్డేనా?

Punganuru
Assembly Constituency Profile

వైఎస్ఆర్‌సిపిలో జగన్
తర్వాత అగ్రశ్రేణి నేతగా పేరున్న నాయకుడు పెద్దిరెడ్డి రామచంద్రారెడ్డి. ఆయన పోటీ
చేస్తున్న నియోజకవర్గం పుంగనూరు. సాంకేతికంగా పుంగనూరు చిత్తూరు జిల్లాలో
ఉన్నప్పటికీ అది రాజంపేట లోక్‌సభా స్థానం పరిధిలోకి వస్తుంది.

పుంగనూరు అసెంబ్లీ
సెగ్మెంట్‌ 1951లో ఏర్పడింది. ఆ నియోజకవర్గంలో ఆరు మండలాలు ఉన్నాయి. అవి సొదం,
సోమల, చౌడేపల్లె, పుంగనూరు, పులిచెర్ల, రొంపిచెర్ల.

పుంగనూరులో 1952, 1962,
1967, 1970, 1972, 1978 ఎన్నికల్లో కాంగ్రెస్ పార్టీ వరుసగా గెలుపొందింది. ఒక్క 1955లో
మాత్రం స్వతంత్ర అభ్యర్ధి గెలిచారు. 1983, 1985, 1989, 1994, 1996, 2004
ఎన్నికల్లో తెలుగుదేశం విజయదుందుభి మోగించింది. 1999లో కాంగ్రెస్ గెలిచింది.
2009లో అదే పార్టీ నుంచి పెద్దిరెడ్డి రామచంద్రారెడ్డి గెలిచారు. 2014, 2019
ఎన్నికల్లో ఆయన వైఎస్ఆర్‌సిపి నుంచి విజయం సాధించి హ్యాట్రిక్ పూర్తి చేసారు.

ఇప్పుడు 2024లోనూ అధికార
వైఎస్ఆర్‌సిపి నుంచి సిట్టింగ్ ఎమ్మెల్యేగా పెద్దిరెడ్డి రామచంద్రారెడ్డి పోటీ
చేస్తున్నారు. ఎన్‌డిఎ కూటమి పక్షాన తెలుగుదేశం అభ్యర్ధిగా చల్లా రామచంద్రారెడ్డి
బరిలోకి దిగారు. ఇండీ కూటమి నుంచి కాంగ్రెస్ పక్షాన డాక్టర్ జి మురళీమోహన్ యాదవ్
నిలబడ్డారు. ఇక్కడ పెద్దిరెడ్డి మరోసారి గెలిచి రెండో హ్యాట్రిక్‌కు శ్రీకారం
చుడదామని భావిస్తుంటే, ఎలాగైన పెద్దిరెడ్డిని నిలువరించడానికి తెలుగుదేశం సర్వశక్తులూ
ఒడ్డుతోంది.