‘జగన్ మాటలు వింటే రాష్ట్రం నల్లమల అడవిలా మలమలా మాడిపోతుంది’

BJP AP Chief Slams YS Jagan, appeals to public to vote for NDA

బిజెపి టిడిపి జనసేన కూటమి ఏర్పాటు
రాక్షస ప్రభుత్వాన్ని ఎదుర్కోవడానికేనని రాష్ట్ర బిజెపి అధ్యక్షురాలు, రాజమండ్రి
పార్లమెంటరీ కూటమి అభ్యర్థి దగ్గుబాటి పురందరేశ్వరి అన్నారు. ప్రధానమంత్రి నరేంద్ర
మోదీ ఆలోచనతోనే కూటమి ఏర్పాటు సాధ్యమైందన్నారు. ఆయన ఆలోచన త్రివేణి సంగమం లాంటిదన్నారు.

తూర్పుగోదావరి జిల్లా కొవ్వూరులో బిజెపి,
టిడిపి, జనసేన ఆత్మీయ సమావేశం సోమవారం నిర్వహించారు. ఆ కార్యక్రమంలో బీజేపీ
అధ్యక్షురాలు పురందరేశ్వరి పాల్గొన్నారు. జగన్ మాట్లాడేవన్నీ అబద్ధాలన్నారు. అత్తారింటికి
దారేది సినిమాలో మాదిరిగా నల్లమల అడవి ముందు జగన్ మాట్లాడితే అడవిలో ఆకులన్నీ రాలిపోయి
నల్లమల మోడువారిపోతుంది అన్నారు. జగన్ పాలనలో అన్ని రంగాలు వెనకబడిపోయాయని ప్రజలు
ఈ ప్రభుత్వాన్ని దించడానికి ఎదురుచూస్తున్నారని ఆమె వ్యాఖ్యానించారు.

ఆదికవి నన్నయ, టంగుటూరి ప్రకాశం పంతులు, గురజాడ
అప్పారావు నడయాడిన, రాజరాజ నరేంద్రుడు పాలించిన రాజమహేంద్రవరంలో ఎంపీగా పోటీ చేయడం తన
అదృష్టమన్నారు. ప్రజలందరూ అన్నా అని పిలుచుకునే నందమూరి తారక రామారావు బిడ్డ అయిన తనను
ఆడపడుచుగా ఆదరించి గెలిపించాలని కోరారు.

జగన్ రాక్షస పాలన చూసి ఓట్లు చీలకుండా
ఎన్డీఏ కూటమి గెలవాలని మొదటి అడుగు వేసిన పవన్ కళ్యాణ్ ను కొనియాడారు. రాష్ట్రం
మళ్ళీ అభివృద్ధి పథంలో నడవాలంటే చంద్రబాబు నాయుడు ముఖ్యమంత్రి కావాలని ఆశాభావం
వ్యక్తం చేశారు.

కార్యక్రమంలో పురందరేశ్వరితో పాటు కొవ్వూరు
కూటమి ఎమ్మెల్యే అభ్యర్థి ముప్పిడి వెంకటేశ్వరరావు, స్థానిక బిజెపి, తెలుగుదేశం,
జనసేన నాయకులు పెద్దసంఖ్యలో పాల్గొన్నారు.