YS Sharmila Bus Yatra for election campaign in Mydukur Assembly Constituency

వైఎస్ వివేకానందరెడ్డి హత్యకేసులో అవినాష్
రెడ్డికి వ్యతిరేకంగా సీబీఐ వద్ద ఆధారాలున్నాయని కాంగ్రెస్ అధ్యక్షురాలు వైఎస్
షర్మిల చెప్పారు. అయినా అవినాష్ రెడ్డిని ముఖ్యమంత్రి వైఎస్ జగన్మోహన్ రెడ్డి
కాపాడుతున్నారని మండిపడ్డారు.

రాష్ట్ర కాంగ్రెస్ అధ్యక్షురాలు వైఎస్ షర్మిల ఎన్నికల
ప్రచారంలో భాగంగా ఇవాళ వైఎస్ఆర్ జిల్లా మైదుకూరు నియోజకవర్గంలో బస్సుయాత్ర
నిర్వహించారు. ఆ సందర్భంగా ప్రజలతో మాట్లాడుతూ వైఎస్సార్ పరిపాలనకు, జగన్ పాలనకూ
ఏమాత్రం పొంతన లేదని మండిపడ్డారు. వైఎస్‌ఆర్‌సిపి పాలనలో రైతులు తీవ్రంగా
నష్టపోయారని ఆవేదన వ్యక్తం చేసారు. పంటనష్టానికి పరిహారం రావడం లేదు, సబ్సిడీలన్నీ
ఎత్తేసారు, ధరల స్థిరీకరణ పేరిట మోసం చేసారని ఆగ్రహం వ్యక్తం చేసారు. కల్తీ
మద్యంతో ప్రజల ప్రాణాలతో చెలగాటమాడుతున్నారని ఆరోపించారు. రెండున్నర లక్షల
ఉద్యోగాలు ఇస్తామని చెప్పి నాలుగేళ్ళు నిద్రపోయారన్నారు. మెగా డీఎస్సీ వేస్తామని
చెప్పి కేవలం 6వేల పోస్టులకు మాత్రమే నోటిఫికేషన్ ఇచ్చారని చెప్పారు.

బాబాయి హత్య కేసులో నిందితుడికే కడప టికెట్
ఇచ్చారని షర్మిల తన సోదరుడు జగన్ మీద విరుచుకుపడ్డారు. అవినాష్ పార్లమెంటులో అడుగు
పెట్టకూడదని, అన్యాయాన్ని ఎదిరించేందుకే ఎంపీగా పోటీ చేస్తున్నాననీ
చెప్పుకొచ్చారు. వైఎస్‌ఆర్ బిడ్డగా తనను గెలిపించాలని నియోజకవర్గ ప్రజలను కోరారు.