‘బాబుకు ఓటేస్తే పులి నోట్లో తల పెట్టినట్టే’

CM Jagan slams Chandrababu Naidu over poll promises

చంద్రబాబునాయుడు మోసాలతో పోటీపడలేమని వైఎస్ఆర్‌సీపీ
అధ్యక్షుడు, రాష్ట్ర ముఖ్యమంత్రి జగన్మోహన్ రెడ్డి అన్నారు. చంద్రబాబుకు ఓటేస్తే
పులి నోట్లో తల పెట్టినట్లేనని వ్యాఖ్యానించారు. ‘మేమంతా సిద్ధం’ బస్సు యాత్ర
పదకొండో రోజు ప్రకాశం జిల్లాలో ప్రజలతో జగన్ ముఖాముఖి మాట్లాడారు.

అవ్వాతాతలంటే చంద్రబాబుకు ప్రేమ లేదనీ, వారి
గురించి ఏనాడూ పట్టించుకోలేదనీ జగన్ మండిపడ్డారు. తమ ప్రభుత్వం అవ్వాతాతలకు పెన్షన్
వాలంటీర్ల ద్వారా ఇంటివద్దకే పంపించే ఏర్పాటు చేసిందని గుర్తుచేసారు. గత ఎన్నికలకు
ఆరునెలల ముందు వరకూ 39లక్షల మందికే పెన్షన్ వచ్చేదనీ, తమ ప్రభుత్వం అధికారంలోకి
వచ్చాక 66 లక్షల మందికి పెన్షన్ ఇస్తున్నామనీ గుర్తు చేసారు. జనాభా ప్రకారం దేశంలో
అత్యధిక సంఖ్యలో పెన్షన్లు ఇస్తున్న రాష్ట్రం ఆంధ్రప్రదేశే అని జగన్
చెప్పుకొచ్చారు.

చంద్రబాబు చేసే మోసాలతో జాగ్రత్తగా ఉండాలని జగన్
ప్రజలను హెచ్చరించారు. సూపర్ సిక్స్, సూపర్ సెవెన్ అంటూ ఇచ్చే హామీలను నమ్మవద్దని
కోరారు. విలువలు, విశ్వసనీయత లేని రాజకీయాలు చేయడం చంద్రబాబుకు అలవాటని
మండిపడ్డారు. అలాంటి రాజకీయాలను మార్చడానికి తను ప్రయత్నిస్తున్నాననీ, ఆ విషయంలో
తనకు సాయం చేయాలనీ జగన్ ప్రజలను కోరారు.