జనసేనకు చిరు విరాళం

Chiranjeevi contribution to Jana Sena Party

మెగాస్టార్ చిరంజీవి తన తమ్ముడు పవన్ కళ్యాణ్
పార్టీ జనసేనకు రూ. 5కోట్ల విరాళం అందజేసారు. త్వరలో జరగబోయే ఎన్నికల్లో జనసేన
పార్టీ అభ్యర్ధులు విజయం సాధించాలని ఆయన ఆకాంక్షించారు.

హైదరాబాద్ నగర శివారులోని ముచ్చింతల్‌లో చిరంజీవి
తాజా సినిమా విశ్వంభర షూటింగ్ జరుగుతోంది. అక్కడికి చిరంజీవి తమ్ముళ్ళు పవన్
కళ్యాణ్, నాగబాబు వెళ్ళారు. పవన్ కళ్యాణ్ చిరంజీవి పాదాలకు నమస్కరించి ఆశీర్వాదం
తీసుకున్నారు. ఆ సందర్భంగా చిరంజీవి, తాను జనసేనకు ఇవ్వదలచుకున్న విరాళాన్ని
చెక్కు రూపంలో పవన్ కళ్యాణ్‌కు అందజేసారు.

ఆ సందర్భంగా చిరంజీవి
ఎక్స్ సామాజిక మాధ్యమంలో తన అభిప్రాయాన్ని పంచుకున్నారు. ‘‘అందరూ అధికారంలోకి
వచ్చిన తరువాత సాయం చేస్తాం అంటారు. అధికారం లేకపోయినా, తన సంపాదనని రైతు కూలీల కోసం పవన్ కళ్యాణ్
వినియోగించటం నాకు సంతోషాన్ని కలిగించిన విషయం. తన స్వార్జితం సమాజం కోసం ఖర్చు
పెట్టే మనసున్న తమ్ముడు పవన్ కళ్యాణ్ లక్ష్యానికి కొంతైనా ఉపయోగపడుతుందని నేను
సైతం జనసేన కి విరాళాన్ని అందించాను’’ అని ఆయన ట్వీట్ చేసారు.