పురందరేశ్వరి ఎన్నికల ప్రచారం నేటినుంచి ప్రారంభం

Purandareswari starts her election campaign from today

భారతీయ జనతా పార్టీ రాష్ట్ర అధ్యక్షురాలు
దగ్గుబాటి పురందరేశ్వరి తన ఎన్నికల ప్రచారాన్ని నేడు చిన్నతిరుపతిలో వెంకటేశ్వరస్వామికి
పూజలు చేసి ప్రారంభించారు.

పురందరేశ్వరి రాజమండ్రి ఎంపి
అభ్యర్ధిగా ప్రచారానికి ద్వారకా తిరుమల నుంచి శ్రీకారం చుట్టారు ఆ సందర్భంగా
మీడియాతో మాట్లాడుతూ రాష్ట్రంలో ఎన్నికల బరిలో నిలబడిన బీజేపీ అభ్యర్థులతో పాటు
కూటమి అభ్యర్థుల విజయాన్ని కాంక్షిస్తూ వెంకటేశ్వర స్వామికి పూజలు చేసినట్లు తెలియజేసారు.
కూటమి అభ్యర్థులను గెలిపించి, రాష్ట్రంలో మార్పు తీసుకురావాలని ప్రజలకు ఆమె
పిలుపునిచ్చారు.

దేవస్థానం సిబ్బందిని ఎన్నికల విధుల్లో
వినియోగించకుండా, భక్తుల సౌకర్యార్థం వారిని ఆలయాలకే పరిమితం చేయాలని ఎన్నికల
కమిషన్‌ను కోరుతున్నానని పురందరేశ్వరి తెలిపారు. ద్వారకా తిరుమల వెంకన్న గుడికి
కుటుంబ సమేతంగా వచ్చిన బిజెపి రాష్ట్ర అధ్యక్షురాలు పురందరేశ్వరికి అర్చకులు ఆలయ మర్యాదలతో
స్వాగతం పలికారు.

పురందరేశ్వరి రాజమండ్రి ఎంపీగా పోటీ చేస్తున్న
నేపథ్యంలో ఎన్నికల పర్యటనలకు ముందు చిన వెంకన్న దర్శనం చేసుకున్నారు.
స్వామివారిని, అమ్మవార్లను దర్శించుకుని పురందరేశ్వరి ప్రత్యేక పూజలు చేసారు. ఆమె నేటి
నుంచి వరుసగా 4 రోజులు రాజమండ్రిలో బస చేసి కూటమి నేతలతో సమావేశాల్లో
పాల్గొంటారు.