Six die in fire accident in chemical factory

తెలంగాణలోని సంగారెడ్డి జిల్లాలో
బుధవారం సాయంత్రం ఘోర అగ్ని ప్రమాదం సంభవించింది. హత్నూర మండలం చందాపూర్ వద్దనున్న
ఎస్‌బి ఆర్గానిక్స్ పరిశ్రమలో రియాక్టర్ పేలి మంటలు చెలరేగాయి. ఆ ఘోర ప్రమాదంలో పరిశ్రమ
డైరెక్టర్ రవి సహా మరో ఆరుగురు కార్మికులు ప్రాణాలు కోల్పోయారు. మరికొందరు తీవ్రంగా
గాయపడ్డారు.

సమాచారం అందుకున్న అగ్నిమాపక సిబ్బంది
ఘటనా స్థలికి చేరుకుని మంటలార్పేందుకు ప్రయత్నిస్తున్నారు. క్షతగాత్రులను
హుటాహుటిన సమీపంలోని ప్రభుత్వ ఆస్పత్రులకు తరలించారు.

రియాక్టర్ పేలుడు తీవ్రతకు మూడు భవనాలు
కుప్పకూలిపోయాయి. భవనాల కింద ఎవరైనా చిక్కుకున్నారా? అని సహాయక చర్యలు చేపట్టారు.
ప్రమాద సమయంలో పరిశ్రమలో 50 మంది కార్మికులు ఉన్నారని సమాచారం. ఫలితంగా
మృతుల సంఖ్య మరింత పెరగవచ్చని ఆందోళన చెందుతున్నారు.

భారీ అగ్ని ప్రమాదం జరిగి పెద్ద ఎత్తున మంటలు
ఎగిసిపడుతుండటంతో స్థానిక ప్రజలు ఆందోళన వ్యక్తం చేస్తున్నారు. ఘటనా స్థలానికి
చేరుకున్న పోలీసులు పరిస్థితిని సమీక్షిస్తున్నారు. మంటలు వ్యాపించకుండా అగ్నిమాపక
సిబ్బంది కృషి చేస్తున్నారు. ఘటనపై పోలీసుల దర్యాప్తు మొదలయింది.