రాబోయే సార్వత్రిక ఎన్నికల్లో కాంగ్రెస్ పార్టీ నుంచి ఏపీలో పోటీ చేసే 117 అసెంబ్లీ, 17 పార్లమెంట్ స్థానాల అభ్యర్థులను దాదాపు ఖరారు చేశారు. అయితే వారి పేర్లు అధికారికంగా ప్రకటించాల్సి ఉంది. ఇంకా 58 అసెంబ్లీ, 8 లోక్‌సభ అభ్యర్థుల పేర్లు పరిశీలనలో ఉన్నాయని ఏపీసీసీ అధ్యక్షురాలు వైఎస్ షర్మిల ఢిల్లీలో చెప్పారు. సీఈసీ సమావేశంలో పాల్గొనేందుకు ఢిల్లీ వెళ్లిన షర్మిల మీడియాకు ఈ విషయం వెల్లడించారు.

కడప లోక్‌సభ బరిలో వైఎస్ షర్మిల నిలవనున్నారు. రాజమహేంద్రవరం నుంచి గిడుగు రుద్రరాజు, కాకినాడ నుంచి కేంద్ర మాజీ మంత్రి పల్లంరాజు, విశాఖ నుంచి సత్యారెడ్డి, బాపట్ల జేడీ శీలం పేర్లు ఖరారైనట్లు సమాచారం అందుతోంది. నంద్యాల, తిరుపతి, అనంతపురం, విజయవాడ, కర్నూలు, గుంటూరు, అరకు, అమలాపురం అభ్యర్థులపై కసరత్తు జరుగుతోంది. ప్రచారంలో చురుగ్గా పాల్గొంటోన్న మాజీ మంత్రి రఘువీరారెడ్డి పోటీకి దూరంగా ఉన్నారు.