సభ్య సమాజం తలదించుకునే ఘటన విజయవాడలో చోటు చేసుకుంది. మద్యానికి బానిసైన ఓ వ్యక్తి, తాగడానికి రూ.70 ఇవ్వలేదని మందుబాటిల్‌తో పొడిచాడు. మంగళవారం విజయవాడ భానునగర్‌లో ఈ అరాచకం చోటుచేసుకుంది. పోలీసులు తెలిపిన వివరాల ప్రకారం.
విజయవాడ భానునగర్‌కు చెందిన పి. వంశీ, జి. దుర్గారావు స్నేహితులు. కూలి పనులు చేసుకుంటూ జీవనం సాగిస్తున్నారు. మంగళవారం రాత్రి ఓ బార్ వద్ద ఇద్దరూ మందు తాగేందుకు వచ్చారు. మద్యం కొనుగోలు చేసేందుకు రూ.70 కావాలంటే వంశీ తన స్నేహితుడు దుర్గారావును అడిగాడు. అతను ఇవ్వడానికి నిరాకరించాడు. దీంతో వంశీ అక్కడే ఉన్న బీరు బాటిల్ పగులకొట్టి దాడి చేశాడు. అనేక సార్లు సీసాతో పొడవడంతో దుర్గారావు అపస్మారకస్థితిలోకి వెళ్లాడు. పోలీసులకు సమాచారం అందించడంతో వెంటనే వారు అక్కడికి చేరుకుని గాయపడ్డ దుర్గారావును ప్రభుత్వ ఆసుపత్రికి తరలించారు. ప్రాణాపాయం తప్పిందని డాక్టర్లు వెల్లడించారు. పోలీసులు కేసు నమోదు చేసి విచారిస్తున్నారు.
