కాంగ్రెస్
పార్టీ పై ప్రధాని నరేంద్ర మోదీ మరోసారి విమర్శలు గుప్పించారు. కుటుంబ పాలన
సాగించే వారిలో అభద్రతా భావం ఎక్కువ అని దుయ్యబట్టారు. తెలంగాణలోని సంగారెడ్డిలో బీజేపీ ఆధ్వర్యంలో నిర్వహించిన ‘విజయ సంకల్ప
సభ’ లో మాట్లాడిన మోదీ, విదేశాల్లో తెలుగు ప్రజలు కీలక భూమిక పోషిస్తున్నారని
కొనియాడారు.
కుటుంబ
పార్టీల కారణంగా ప్రతిభావంతులకు అన్యాయం జరుగుతోందన్నారు. కశ్మీర్ నుంచి
కన్యాకుమారి వరకు గతంలో కుటుంబ పార్టీలు పాలించాయన్న మోదీ, ఆ పార్టీలు ఉన్నచోట వాటి అధినేతల కుటుంబాలే
బాగుపడ్డాయన్నారు. దోచుకోవడానికి వారికి ఏమైనా లైసెన్స్ ఉందా అని ప్రశ్నించారు.
కుటుంబ
పార్టీలే ప్రజాస్వామ్యానికి శత్రువులు అన్నారు. కుటుంబ వాదులు తనపై మాటల దాడి
చేస్తున్నారన్న మోదీ, దేశంలోని ప్రతీ తల్లి, సోదరి, యవకులు, చిన్నారులు అంతా మోదీ కుటుంబమే అన్నారు.
కాంగ్రెస్, బీఆర్ఎస్ పార్టీలు రెండూ ఒక్కటేనన్న
మోదీ, ఆ పార్టీలు కుమ్మక్కు అయిన విషయం ప్రజలకు అర్థమైందన్నారు. తెలంగాణలో బీజేపీకి
ఆదరణ పెరుగుతోందన్నారు.
కాళేశ్వరంలో బీఆర్ఎస్ దోచుకుంటే,
విచారణ పేరుతో కాంగ్రెస్ అదే చేస్తుందన్నారు. తెలంగాణను కాంగ్రెస్ ఏటీఎంలా
మార్చుకుందన్న మోదీ, ఆ పార్టీ ఆటలు ఎక్కువ కాలం సాగవన్నారు.