లంచం కేసుల్లో చట్టసభల సభ్యులకు మినహాయింపు లేదు: సుప్రీం తీర్పు

Supreme says MPs and MLAs have no exemption from bribery cases

భారతదేశపు పార్లమెంటు, లేదా
వివిధ రాష్ట్రాల శాసనసభల్లో సభ్యులు ఎవరైనా అవినీతికి పాల్పడితే వారికి విచారణలో
ఎలాంటి మినహాయింపూ ఉండబోదని సుప్రీంకోర్టు స్పష్టం చేసింది. ఆ మేరకు దేశ ఉన్నత
న్యాయస్థానం ఈ ఉదయం కీలకమైన తీర్పు వెలువరించింది. లంచం కేసుల్లో ఎంపీలు, ఎమ్మెల్యేలకు
మినహాయింపు ప్రసక్తే లేదని తేల్చిచెప్పింది. చట్టసభల్లో ప్రసంగాలు, ప్రశ్నలు, ఓట్లకు
లంచం తీసుకునే సభ్యులకు ఎలాంటి రక్షణా కల్పించబోమని ఏడుగురు సభ్యుల రాజ్యాంగ
ధర్మాసనం ఏకగ్రీవంగా తీర్పు వెలువరించింది. ఈ మేరకు 1998 నాటి
తీర్పును న్యాయస్థానం కొట్టేసింది.

2012 రాజ్యసభ ఎన్నికల్లో జేఎంఎం సభ్యురాలు
సీతాసోరెన్ ఒకరి నుంచి లంచం తీసుకుని మరొకరికి ఓటు వేసారన్న ఆరోపణల మీద సీబీఐ
క్రిమినల్ కేసు నమోదు చేసింది. ఆ కేసును కొట్టేయాలని సీతాసోరెన్ మొదట జార్ఖండ్
హైకోర్టును ఆశ్రయించారు. హైకోర్టు ఆ కేసును తిరస్కరించడంతో సుప్రీంకోర్టుకు
వెళ్ళారు.

ఆ కేసును 2019లో ముగ్గురు
సభ్యుల బెంచ్ విచారించి, ఐదుగురు సభ్యుల రాజ్యాంగ ధర్మాసనానికి సిఫారసు చేసింది.
సుప్రీంకోర్టు ప్రధాన న్యాయమూర్తి నేతృత్వంలోని ఆ బెంచ్, పీవీ నరసింహారావు కేసులో
తీర్పును మళ్ళీ పరిశీలించాలంటూ ఏడుగురు సభ్యుల విస్తృత ధర్మాసనాన్ని ఏర్పాటు
చేసింది. ఆ బెంచ్ ఈ కేసును సమగ్రంగా విచారించింది. ఈ ఉదయం ఆ కేసులో కీలక
తీర్పునిచ్చింది. పార్లమెంటరీ అధికారాలను అడ్డుపెట్టుకుని అవినీతికి పాల్పడేవారికి
న్యాయస్థానం రక్షణ కల్పించదని స్పష్టం చేసింది. 1998 తీర్పు రాజ్యాంగ అధికరణాలకు
విరుద్దంగా ఉందని తేల్చిచెప్పింది. లంచాలు తీసుకునే రాజకీయ నాయకుల విశ్వసనీయతపై తీవ్ర
ప్రభావం చూపిస్తుందని పేర్కొంది.