వైసీపీ నుంచి మరో ఎమ్మెల్యే తెలుగుదేశం పార్టీ తీర్థం పుచ్చుకున్నారు. ఎన్టీఆర్ జిల్లా మైలవరం వైసీపీ ఎమ్మెల్యే వసంత వెంకట కృష్ణప్రసాద్, చంద్రబాబునాయుడు సమక్షంలో టీడీపీలో చేరారు. గత కొంత కాలంగా వైసీపీ అధినేత జగన్‌మోహన్‌రెడ్డి తీరుపట్ల అసంతృప్తిగా ఉన్న వసంత కృష్ణప్రసాద్ ఎట్టకేలకు టీడీపీ కండువా కప్పుకున్నారు. 2019 ఎన్నికల్లో మైలవరం నియోజకవర్గం వైసీపీ అభ్యర్థిగా బరిలో దిగి మాజీ మంత్రి దేవినేని ఉమమహేశ్వరావును ఓడించి సంచలనం సృష్టించారు.
వైసీపీ నుంచి టీడీపీలో చేరిన మైలవరం ఎమ్మెల్యే వసంత కృష్ణప్రసాద్ మరలా అక్కడ నుంచే పోటీ చేస్తానని ప్రకటించారు. జనసేన, టీడీపీ కార్యకర్తలు నాయకులు అందరి సహకారంతో మైలవరంలో పోటీ చేయనున్నట్లు రెండు రోజుల కిందటే ఆయన ప్రకటించిన సంగతి తెలిసిందే.
