వైసీపీ నుంచి ఎంపీల వలసలు కొనసాగుతున్నాయి. తాజాగా మచిలీపట్నం ఎంపీ బాలశౌరి, జనసేన అధినేత పవన్ కళ్యాణ్ సమక్షంలో ఆ పార్టీలో చేరారు. వేలాది మంది కార్యకర్తలు ర్యాలీగా రాగా మంగళగిరిలోని జనసేన కార్యాలయంలో ఆదివారంనాడు ఆయన జనసేన తీర్థం పుచ్చుకున్నారు. వేల కోట్లు ఖర్చుపెట్టి వైసీపీ అధినేత జగన్‌మోహన్‌రెడ్డి సిద్దం అంటున్నారని, దేనికి సిద్ధం. పారిపోవడానికా? అంటూ బాలశౌరి ప్రశ్నించారు. 2004 నుంచి ఏం జరుగుతోందో తనకు అంతా తెలుసని ఆయన వ్యాఖ్యానించారు. పాదయాత్రలో వందలాది హామీలిచ్చి తుంగలో తొక్కాడని బాలశౌరి దుయ్యబట్టారు.
జీవితంలో అసలు అబద్దాలు చెప్పనని ఎన్నికల సభల్లో చెప్పారని, అధికారంలోకి రాకముందు విజయవాడ, గుంటూరు మధ్య రాజధాని ఉంటుందని, అధికారంలోకి రాగానే మాట మార్చారని బందరు ఎంపీ విమర్శించారు. అమరావతి రాజధాని పేరు చెప్పి ఓట్లుదండుకుని, ఏపీ ప్రజలను మోసం చేశాడని ఆయన విరుచుకుపడ్డారు.
జగన్ ప్రభుత్వంలో చేసిన పనులకు బిల్లులు రాక కాంట్రాక్టర్లు ఆత్మహత్యలకు పాల్పడుతున్నారని ఎంపీ బాలశౌరి తప్పుపట్టారు. జగన్ మాటలు నమ్మి వైసీపీలో చేరి, ప్రజల్లో అభాసుపాలయ్యామని ఆవేదన వ్యక్తం చేశారు. చాలా విషయాలు తనకు తెలుసని, సమయం వచ్చినప్పుడు చెబుతానని ఎంపీ బాలశౌరి చేసిన వ్యాఖ్యలు ఇప్పుడు సోషల్ మీడియాలోనూ దుమారం రేపుతున్నాయి.
