పోలీసుపై ఓ దొంగ దాడి చేసి తీవ్రంగా గాయపరిచిన ఘటన సంచలనంగా మారింది. శ్రీపొట్టిశ్రీరాములు నెల్లూరు జిల్లా విడవలూరు పోలీస్ స్టేషన్లో గత రాత్రి ఈ ఘోరం జరిగింది. పోలీసుల సమాచారం ప్రకారం. అల్లూరు మండలం మోపూరుకు చెందిన జాన్‌వెస్లీ, విడవలూరు మండలం, భద్రాచలం గ్రామంలోని తన బంధువుల ఇంటికి వచ్చాడు. అర్థరాత్రి బైకు అపహరించి పారిపోయే క్రమంలో కొంతదూరం వెళ్లాక పెట్రోల్ అయిపోయింది. అక్కడే ఓ ఇంటి ముందున్న బైకులో పెట్రోల్ దొంగిలిస్తుండగా (crime news ) స్థానికులు పట్టుకుని పోలీసులకు అప్పగించారు.
విడవలూరు పోలీసులు దొంగను స్టేషన్‌కు పట్టుకొచ్చారు. స్టేషన్లో ఏఎస్సై హరేంద్రబాబు, కానిస్టేబుల్ శ్రీనివాసులు డ్యూటీలో ఉన్నారు. తెల్లవారుజామున నిద్రలో ఉన్న కానిస్టేబుల్ శ్రీనివాసులపై జాన్‌వెస్లీ ఇనుపరాడ్డుతో దాడిచేసి తీవ్రంగా గాయపరిచాడు. కానిస్టేబుల్ కేకలు వేయడంతో ఏఎస్సై హరేంద్రబాబు వచ్చారు. అప్పటికే పారిపోయాడని వారు చెప్పారు. దొంగ దాడిలో తీవ్రంగా గాయపడ్డ కానిస్టేబుల్ శ్రీనివాసులును ఓ ప్రైవేటు ఆసుప్రతికి తరలించారు. దొంగ కోసం గాలిస్తున్నారు.
