కర్ణాటకలోని చిక్‌బళ్లాపూర్ వద్ద ఘోర రోడ్డు ప్రమాదం చోటు చేసుకుంది. ఆగి ఉన్న లారీని టాటా సుమో ఢీ కొనడంతో, 12 మంది ప్రయాణీకులు చనిపోయారు.వీరంతా దసరా పండుగకు శ్రీసత్యసాయి జిల్లా గోరంట్లకు వచ్చి, తిరిగి పనులకు వెళుతున్న కూలీలుగా గుర్తించారు. మరో ఇద్దరి పరిస్థితి కూడా విషమంగా ఉన్నట్లు తెలుస్తోంది.
దసరా పండగకు సొంతూళ్లకు వచ్చిన వలస కూలీలు, తిరిగి పనుల్లోకి వెళ్లేందుకు సుమోలో బెంగళూరు సమీపంలోని హౌంగసంద్రకు బయలుదేశారు. ఇవాళ తెల్లవారుజామున పొగమంచు ఎక్కువగా ఉండటంతో డ్రైవర్ నరసింహులు ఆగి ఉన్న ట్యాంకర్‌ను గుర్తించలేదని తెలుస్తోంది. దీంతో ట్యాంకర్‌ను అతివేగంగా ఢీ కొనడంతో ఈ ఘోర ప్రమాదం జరిగిందని పోలీసులు తెలిపారు. ఈ దుర్ఘటనలో 5 మంది అక్కడికక్కడే చనిపోగా, ఏడుగురు చిక్‌బళ్లాపూర్ ఆస్పత్రిలో చికిత్స పొందుతూ మరణించారు.ఈ ఘటనపై కేసు నమోదు చేసి దర్యాప్తు చేస్తున్నట్లు పోలీసులు వెల్లడించారు.
