హమాస్ ఉగ్రవాద సంస్థపై యుద్ధం ప్రకటించడం కోసం ఇజ్రాయెల్
ప్రధానమంత్రి బెంజమిన్ నెతన్యాహు అత్యవసర ప్రభుత్వం ఏర్పాటు చేసారు. హమాస్‌ను ఈ
భూమ్మీద లేకుండా తుడిచిపెట్టేస్తామని ఇజ్రాయెల్ రక్షణశాఖ మంత్రి ప్రతిజ్ఞ చేసారు.
పాలస్తీనాకు చెందిన ఉగ్రవాద సంస్థ
హమాస్ ఇజ్రాయెల్ మీద గత శనివారం బీభత్సమైన దాడికి పాల్పడింది. ఆ దాడిలో కనీసం
1200 మంది ఇజ్రాయెలీలు ప్రాణాలు కోల్పోయారు. దానికి ప్రతిగా గాజా స్ట్రిప్ ప్రాంతం
నుంచి ఇజ్రాయెల్ సైతం హమాస్ మిలిటెంట్ స్థావరాల మీద దాడులు చేస్తోంది. ఆ దాడుల్లో
వెయ్యి మందికి పైగా హతమయ్యారు. అప్పటినుంచీ ఇరుపక్షాల మధ్యా నిరంతరాయంగా దాడులు
జరుగుతున్నాయి. అంతేకాక గాజా స్ట్రిప్ ప్రాంతం చుట్టూ ఇజ్రాయెల్ తన బలగాలను
మోహరిస్తోంది. హమాస్ సంస్థను పూర్తిగా రూపుమాపడానికే ఇజ్రాయెల్ ప్రయత్నిస్తుందన్న
అంచనాలు బలం పుంజుకుంటున్నాయి.
ఈ నేపథ్యంలో ఇజ్రాయెల్ బుధవారం నాడు అత్యవసర
ప్రభుత్వాన్ని ఏర్పాటు చేసింది. ప్రధానమంత్రి నెతన్యాహు, ప్రధాన ప్రతిపక్ష నేత,
మాజీ డిఫెన్స్ చీఫ్ అయిన బెన్నీ గాంజ్ ఇద్దరూ అత్యవసర ప్రభుత్వాన్ని ఏర్పాటు
చేయడానికి అంగీకరించినట్లు సంయుక్త ప్రకటన విడుదల చేసారు. ఆ ప్రభుత్వంలో
వారిద్దరితో పాటు రక్షణ మంత్రి యోవ్ గాలంట్ కూడా ఉంటారు.
‘‘ఈ భూమి మీద నుంచీ ‘హమాస్, ఐఎస్ఐఎస్-గాజా’ అనేది
లేకుండా తుడిచిపెట్టేస్తాం. ఇకపై అది ఉనికిలో ఉండదు’’ అని రక్షణ మంత్రి గాలంట్
ప్రకటించారు.
ఇజ్రాయెల్ మాజీ రక్షణమంత్రి, ప్రస్తుతం ప్రతిపక్ష
నాయకుడు అయిన గాంజ్, ఈ యుద్ధ సమయంలో అందరూ కలిసికట్టుగా ఉండాలన్నారు.
గాజాలో హమాస్‌తో యుద్ధం చేస్తున్న ఈ తరుణంలో
అత్యవసర ప్రభుత్వం మరే ఇతర విధానాలు, చట్టాలనూ చేయబోదని అధికార, ప్రతిపక్ష
నేతలిద్దరూ సంయుక్త ప్రకటనలో వెల్లడించారు.
మరో ప్రతిపక్ష నేత యేర్
లాపిడ్ ఈ దశలో అత్యవసర ప్రభుత్వంలో చేరే అవకాశం లేదని సమాచారం.
