జమ్ము కశ్మీర్‌లో ఎన్‌కౌంటర్ చోటు చేసుకుంది. ఇద్దరు లష్కరే తోయిబా తీవ్రవాదులను సైన్యం మట్టుబెట్టింది. జమ్మూ కశ్మీర్‌లోని సోపియాన్ జిల్లాలో ఈ ఎన్‌కౌంటర్ జరిగినట్లు స్థానిక పోలీసు అధికారులు వెల్లడించారు. ఎన్‌కౌంటర్‌లో హతమైన వారిని లష్కరే తోయిబాకు చెందిన మరిఫత్ మక్భూల్, జాజిమ్ ఫరూక్ అలియాస్ అబ్రార్‌గా గుర్తించారు.
జమ్మూ కశ్మీర్‌లోని పండిట్ సంజయ్ శర్మ హత్య కేసులో అబ్రార్ ప్రమేయం ఉందని కశ్మీర్ అడిషినల్ డీజీపీ ఎక్స్‌లో పోస్ట్ చేశారు. మంగళవారం తెల్లవారుజామున సోపియాన్ జిల్లా అల్‌షిపోరా ప్రాంతంలో సైనికులకు, ముష్కరులకు మధ్య కాల్పులు జరిగినట్లు ప్రకటించారు. మిలిటెంట్ల కదలికలపై పక్కా సమాచారం మేరకు సైన్యం చేపట్టిన ఆపరేషన్‌లో ఇద్దరు లష్కరే తోయిబా ఉగ్రవాదులు హతమైనట్లు పోలీసు అధికారులు ప్రకటించారు.
