Lucky Lottery: ఉత్తరప్రదేశ్ వాసి జీవితాన్నే మార్చేసిన వింత లాటరీ

లాటరీల్లో వారికి పది కోట్లు వచ్చాయి. వీరికి వంద కోట్లు వచ్చాయంటూ మనం పత్రికల్లో, టీవీల్లో చూస్తూనే ఉంటాం. అయితే ఉత్తరప్రదేశ్ వాసి ఆదిల్ ఖాన్‌కు యూఏఈలో నిర్వహించిన మెగా ప్రైజ్ మనీ లక్కీ డ్రాలో వింతైన లాటరీ వరించింది. యూఏఈలో ఫాస్ట్ 5 పేరుతో నిర్వహించిన ఓ లాటరీలో ఉత్తరప్రదేశ్ వాసికి నెల నెలా రూ.5.50 లక్షల చొప్పున 25 సంవత్సరాలపాటు అందించే స్కీమ్ గెలుచుకున్నాడు. ఫాస్ట్ 5 పేరుతో నిర్వహించిన మెగా ఫ్రైజ్ మనీ లక్కీ డ్రాలో యూపీ వాసి మొదటి స్థానంలో నిలిచాడు. దీంతో అతనికి ప్రతి నెలా 25000 దిర్హమ్‌లు అంటే సుమారు నెలకు రూ.5.50 లక్షలు లభించనున్నాయి.

వింతైన లాటరీలో గెలవడంతో ఆదిల్ ఖాన్ సంతోషానికి అవదులు లేకుండా పోయాయి. తన కుటుంబానికి తానే ఏకైక ఆధారమని, ఈ లాటరీ తనకు తన కుటుంబానికి ఎంతగానో ఉపయోగపడుతుందని ఆదిల్ ఖాన్ చెప్పారు. ఈ లాటరీ తగిలిందని ఇంట్లో వారికి చెప్పినా మొదట నమ్మలేదని, నెంబరు ఒకటికి రెండు సార్లు చెక్ చేసుకోవాలని వారు సూచించినట్టు ఆయన గుర్తుచేశారు. ఇప్పటికీ ఈ విషయాన్ని తాను నమ్మలేకపోతున్నానని ఆదిల్ పేర్కొన్నారు.

ఫాస్ట్ 5 లక్కీ లాటరీ ప్రారంభించిన 8 వారాల్లోనే తొలి విజేతను ప్రకటిస్తున్నందుకు తమకు ఎంతో ఆనందంగా ఉందని ఎమిరేట్స్‌లో లాటరీ నిర్వహించే టైచెరస్ మార్కెటింగ్ హెడ్ అన్నారు. తక్కువ సమయంలోనే తమ ద్వారా ఓ వ్యక్తిని మిలియనీర్‌ను చేసే ఉద్దేశంతోనే ఇలాంటి లాటరీని తీసుకువచ్చినట్టు ఆ సంస్థ తెలిపింది. లాటరీ విజేతల ప్రయోజనాల కోసం ఒకేసారి కాకుండా ప్రతీ నెలా కొంత మొత్తం చెల్లించేలా వినూత్నంగా దీన్ని డిజైన్ చేసినట్టు టైచెరస్ మార్కెటింగ్ హెడ్ వెల్లడించారు.