ప్రపంచంలోనే అత్యంత అవినీతి గల దేశాల జాబితాలో భారత్ స్థానం మరింత దిగజారింది. 2024కు సంబంధించి అవినీతి కలిగిన జాబితాను ట్రాన్స్‌పరెన్సీ ఇంటర్నేషనల్ తాజాగా విడుదల చేసింది. మొత్తం 180 దేశాలకు సంబంధించిన అవినీతి సూచీని విడుదల చేయగా భారత్‌ 96వ స్థానంలో నిలిచింది.

ప్రతి ఏడాది లో నిపుణులు, వ్యాపారవేత్తల దృష్టిలో ఆయా దేశాల్లో అవినీతి ఏ స్థాయిలో ఉందనే అంచనాల ప్రాతిపదికన ఈ సూచీని రూపొందిస్తారు. ఈ సూచీలో 0 నుంచి100 వరకూ స్కోర్‌ ఉంటుంది. సున్నా స్కోర్‌ ఉంటే పూర్తిగా అవినీతిగా.. 100 స్కోర్‌ సాధిస్తే అవినీతి రహితమైనదిగా లెక్కిస్తారు. జాబితాలో డెన్మార్క్‌ 100కు 90 పాయింట్లతో మొదటిస్థానంలో నిలిచింది. డెన్మార్క్‌ తర్వాత 88 పాయింట్లతో ఫిన్లాండ్‌ రెండో స్థానంలో ఉండగా 84 పాయింట్లతో సింగపూర్‌ మూడో స్థానంలో, 83 పాయింట్లతో న్యూజిలాండ్‌ నాలుగోస్థానంలో , 81 పాయింట్లతో లక్సంబర్గ్‌ ఐదో స్థానంలో ఉన్నాయి.

జాబితాలో భారత్‌ 38 పాయింట్లతో 96వ స్థానంలో నిలిచింది. గతంతో పోలిస్తే భారత్‌ మూడు స్థానాలకు పడిపోగా 2023లో 39 పాయింట్లతో 93వ స్థానంలో నిలిచింది. 2022లో 40 పాయింట్లతో 85వ స్థానంలో నిలవగా తాజాగా 96వ స్థానానికి దిగజారింది.

పాకిస్తాన్ 27 పాయింట్లతో 135వ ర్యాంకు‌, శ్రీలంక 32 పాయింట్లతో 121వ ర్యాంకు, బంగ్లాదేశ్‌లు 149వ ర్యాంకులో నిలిచాయి. తాలిబన్‌ పాలనలోని ఆఫ్ఘనిస్థాన్ ‌ 17 స్కోరుతో 165వ స్థానంలో ఉండగా చైనా 76వ స్థానంతో సరిపెట్టుకుంది.

అత్యంత అవినీతిమయమైన దేశంగా సౌత్‌ సుడాన్‌ 180వ ర్యాంక్‌తో 08 స్కోర్‌ సాధించింది. సొమాలియా (09‌)‌, వెనుజులా (10)‌, సిరియా (12), యోమన్‌ (13), లిబియా (13), ఈక్వటోరియల్‌ గునియా (13), నికరాగ్వా (15)తో అత్యంత అవినీతిమయమైన దేశాలుగా ఉన్నాయి.