కాంగ్రెస్ పార్టీ సీనియర్ నేత, కర్ణాటక మాజీ ముఖ్యమంత్రి ఎస్‌ఎం కృష్ణ కన్నుమూశారు. గత కొంత కాలంగా వృద్దాప్యంతో కూడిన అనారోగ్యంతో బాధపడుతోన్న కృష్ణ, బెంగళూరులోని సదాశివనగర్‌లోని ఆయన స్వగృహంలో కన్నుమూశారు. 1999 నుంచి 2004 వరకు కర్ణాటక సీఎంగా సేవలందించారు. బెంగళూరు ఐటీ హబ్‌గా మారడానికి ఎస్‌ఎం కృష్ణ వేసిన పునాదులు ఉపయోగపడ్డాయి.

2004 నుంచి 2008 వరకు మహారాష్ట్ర గవర్నర్‌గా, 2009 నుంచి 2012 వరకు విదేశాంగ మంత్రిగా ఎస్ఎమ్ కృష్ణ పనిచేశారు. 1932, మే 1న కర్ణాటక‌లోని మాండ్యా జిల్లాలో జన్మించిన ఎస్ఎమ్ కృష్ణ విదేశాల్లో న్యాయవిద్యను అభ్యసించారు. 1962లో కర్నాటకలోని మద్దూర్ నియోజకవర్గం నుంచి స్వతంత్ర అభ్యర్థిగా ఎమ్మెల్యేగా గెలుపొందారు. 30 ఏళ్లకే స్వతంత్ర ఎమ్మెల్యేగా గెలిచి రికార్డు సృష్టించారు. తరవాత కాంగ్రెస్ పార్టీలో చేరి పలు పదవులు నిర్వహించారు.

ఎస్ఎమ్ కృష్ణ మృతిపట్ల ప్రధాని నరేంద్ర మోదీ తీవ్ర దిగ్భ్రాంతి వ్యక్తం చేశారు. ఎస్ఎమ్ కృష్ణకు పుస్తకపఠనం అంటే చాలా ఆసక్తి ఉండేదని గుర్తు చేసుకున్నారు. బెంగళూరు ఐటీ కేంద్రంగా మార్చడంలో ఎస్ఎమ్ కృష్ణ సేవలు మరవలేనివన్నారు. ఏపీ సీఎం చంద్రబాబునాయుడు ఎస్ఎమ్ కృష్ణ మృతిపట్ల సంతాపం తెలిపారు. తాను ఉమ్మడి ఏపీ సీఎంగా ఉన్న సమయంలో పెట్టుబడులను ఆకర్షించడానికి ఎస్ఎమ్ కృష్ణతో పోటీపడినట్లు గుర్తుచేసుకున్నారు.