తిరుమలలో శ్రీ సీతా లక్ష్మణ సమేత శ్రీరామచంద్ర మూర్తి ఉత్సవ విగ్రహాలకు ప్రత్యేక పూజలు శాస్త్రోక్తంగా నిర్వహించారు. 2021 సంవత్సరంలో శ్రీరాముల విగ్రహాం ఎడమచేయి మధ్య వేలి భాగంలో చిన్న భిన్నం ఉన్నట్లు గుర్తించారు. అప్పట్లో ఆ వేలుకు బంగారు కవచాన్ని తొడిగి ఏర్పడిన భిన్నాన్ని సవరించారు.
సాధారణంగా ఇలాంటి చిన్నపాటి భిన్నాలు ఉత్సవమూర్తులకు ఏర్పడితే, 12 ఏళ్ళకు ఒకసారి నిర్వహించే మహా సంప్రోక్షణ సందర్భంగా సవరిస్తారు. తిరుమలలో మహా సంప్రోక్షణ కార్యక్రమం 2018లో టీటీడీ నిర్వహించింది. తదుపరి మహా సంప్రోక్షణ 2030లో జరగనుంది. అందుకు ఇంకా ఐదు సంవత్సరాల గడువు ఉంది.
జీయర్ స్వాములు, ఆగమ సలహాదారులు, అర్చకులతో కూడిన కమిటీ ఇటీవల బ్రహ్మోత్సవాల సమయంలో ప్రస్తుత అధికారులకు ఈ విషయాన్ని వివరించింది. అందుకు అవసరమైన సంప్రోక్షణ ను మంగళ, బుధవారాల్లో నిర్వహించారు.
ఇలా చేయడం ద్వారా ఉత్సవ విగ్రహాలకు ఎలాంటి దోషం ఉండదని కూడా కమిటీ పేర్కొంది.
సంపంగి ప్రాకారంలో జరిగిన ఈ క్రతువుల్లో భాగంగా వైఖానస ఆగమ శాస్త్రం ప్రకారం కళాపకర్షణ, బింబ వాస్తు, మహాశాంతి తిరుమంజనం, శయనాధివాసం పూజలు చేశారు. అనంతరం ప్రత్యేక హోమం నిర్వహించి పూర్ణాహుతి, కళావాహన కార్యక్రమాలు నిర్వహించారు. ఉత్సవ మూర్తి లో ఉన్న చిన్నపాటి భిన్నాన్ని శాస్త్రోక్తంగా సవరించారు.
ఈ క్రతువులో తిరుమల జీయర్ స్వామీజీలు, తిరుమల ప్రధాన అర్చకులు శ్రీ వేణు గోపాల దీక్షితులు, శ్రీ కృష్ణ శేషాచల దీక్షితులు, శ్రీ గోవిందరాజ దీక్షితులు పాల్గొన్నారు. పునర్వసు నక్షత్రం సందర్భంగా బుధవారం సాయంత్రం సహస్ర దీపాలంకార సేవలో శ్రీ సీతా లక్ష్మణ సమేత శ్రీరామచంద్ర మూర్తి
భక్తులను అనుగ్రహించారు.
