ఆధునిక ప్రపంచం ఎదుర్కొంటున్న అనేక సవాళ్ళకు భారతీయ తత్వచింతనే పరిష్కారమని మాజీ ఉపరాష్ట్రపతి ముప్పవరపు వెంకయ్య నాయుడు చెప్పారు. ప్రముఖ భారతీయ తత్వవేత్త ఆచార్య కొత్త సచ్చిదానందమూర్తి శత జయంతి సందర్భంగా నాగార్జున విశ్వవిద్యాలయంలో సోమవారం ‘ప్రొ. సచ్చిదానంద మూర్తి సెంటర్ ఫర్ స్టడీస్ ఇన్ ఆఫ్రో-ఏషియన్ ఫిలాసఫీ’ నిర్వహించిన ప్రత్యేక సదస్సుకు వెంకయ్య నాయుడు ముఖ్య అతిథిగా హాజరయ్యారు. కొత్త సచ్చిదానందమూర్తి విగ్రహాన్ని ఆవిష్కరించి పుష్పాంజలి ఘటించారు. సచ్చిదానందమూర్తి అముద్రిత రచనలను “ఆన్ ఎడ్యుకేషన్ & ది ఫిలాసఫీ ఆఫ్ ఎడ్యుకేషన్” పేరుతో ప్రచురించిన పుస్తకాన్ని, ఆయన స్మృతి చిహ్నంగా తీసుకువచ్చిన పోస్టల్ కవర్‌ను ఆవిష్కరించారు.
ఆ సందర్భంగా వెంకయ్య నాయుడు మాట్లాడుతూ “ఆధునిక విద్యాభ్యాసంలో తత్వశాస్త్రం ప్రత్యేక విభాగంగా రూపుదిద్దుకోవడం మనిషి వికాసానికి, సమాజ వికాసానికి మేలు చేసే విషయం. బాల్యదశ నుంచే పాఠ్య ప్రణాళికలో మన తత్వ విజ్ఞానాన్ని క్రమబద్ధమైన భాగంగా చేయడం వల్ల దీర్ఘకాలికంగా మన దేశానికి ఎంతో ప్రయోజనకరం” అని సూచించారు. వివిధ ఉపనిషత్తుల్లో మహర్షులు చేసిన బోధనలను ఉటంకించారు. వృక్షో రక్షిత రక్షితః, వసుధైవ కుటుంబకం, మానవసేవే మాధవసేవ, అహింసా పరమో ధర్మః వంటి భారతీయ తాత్విక బోధనలు ప్రపంచ సమస్యలకు పరిష్కారం చూపిస్తాయన్నారు.
విద్యార్థి దశలోనే సరైన, సానుకూల బీజాలు నాటగలిగినప్పుడే మంచి పౌరులు, తద్వారా మంచి సమాజం ఏర్పడుతుందని చెప్పారు. భారతీయ తత్వ దర్శనమే దానికి సరైన పరిష్కారం అన్నారు. “ప్రపంచం నలుమూలల విస్తరిస్తున్న పెడపోకడలకు భిన్నమైన సమాజంగా మనం ఎదగాలన్నా, ప్రపంచం మనల్ని అనుసరించాలన్నా తిరిగి మనం మన మూలాలకు వెళ్లాలి. మన విద్యా విధానాన్ని సమూలంగా మార్చుకోవాలి. నూతన విద్యా విధానం ఈ దిశగా కృషి చేస్తోంది. ” అని పేర్కొన్నారు.
“జీవ చైతన్యం, జీవితపు చైతన్యం విషయంలో భారత ఉపఖండం కొన్ని వేల సంవత్సరాలుగా మిగిలిన ప్రపంచం కన్నా ముందు ఉంది. విశ్వ గురువుగా ఆవిర్భవించింది. ప్రపంచం నలుమూలల ఎంతోమందికి చైతన్యపు వెలుగులను చూపించింది. భారత ఉపఖండంలో ఈ జిజ్ఞాసతోనే ఎందరో ఋషులు, మహర్షులు అవతరించారు. వేద వేదాంగాలు, ఉపనిషత్తులు, బ్రహ్మ సూత్రాలు, త్రిపిటకాలు అవతరించాయి. తత్వాన్ని బోధపరిచాయి. బోధపరుస్తూనే ఉన్నాయి. భారతీయ తత్వశాస్త్రంలో లౌకిక, అలౌకిక చింతనలు రెండూ ఉన్నాయి. ఆధ్యాత్మిక, తార్కిక, శాస్త్ర విజ్ఞాన చింతనలు ఇమిడి ఉన్నాయి. ఇంతటి బహుళ తాత్వికచింతనలు ప్రపంచంలోని మరే దేశంలోనూ ఆవిర్భవించలేదు. తత్వపు వెలుగులను ప్రసరింప చేయడానికి ఈ పుణ్య భూమిలో ఎందరో మహనీయులు తమ జీవితాలను ధారపోశారు. ” అని చెప్పారు
20వ శతాబ్దంలో జిడ్డు కృష్ణమూర్తి గారు, డా. సర్వేపల్లి రాధాకృష్ణన్ తర్వాత భారతీయ తత్వ శాస్త్రాన్ని విశ్వవ్యాప్తం చేసిన గొప్ప జ్ఞాని కొత్త సచ్చిదానందమూర్తి అని కొనియాడారు. “జ్ఞాన సముపార్జనలో, దాన్ని పదిమందితో పంచుకోవడంలో వారు చూపిన తపన నేటి తరానికి స్ఫూర్తిదాయకం” అన్నారు. సాధారణ రైతు కుటుంబంలో పుట్టిన సచ్చిదానంద మూర్తి ప్రపంచ ప్రఖ్యాతి గాంచిన స్థాయికి ఎదగడం వెనక ఆయన స్వయంకృషి ఉందన్నారు. సచ్చిదానందమూర్తి భారతీయ తత్వాన్ని అణువణువునా జీర్ణించుకొని ఆచరించి చూపిన ఆధునిక ఋషి అన్నారు. భారతీయ తత్వ దర్శనం లోనే కాకుండా ఇతర దేశాల్లోని తత్వచింతనలను కూడా పూర్తిగా ఆకళింపు చేసుకున్న గొప్ప జ్ఞాన నిధి అని చెప్పారు.
“మనకున్న సంపదను, విజ్ఞానాన్నీ పదిమందితో పంచుకోవాలని సనాతన ధర్మం బోధిస్తోంది. పంచుకుంటే పెరుగుతుంది కానీ తగ్గదు. ఆ సనాతన ధర్మాన్ని అణువణువునా నింపుకొని ఆయన ఆచరించి చూపించారు. తన విజ్ఞానాన్ని జీవితమంతా పంచుతూనే ఉన్నారు. తాను పుట్టి పెరిగిన ప్రాంతంలో విద్యాభివృద్ధికి ఎంతో కృషి చేశారు.” అని పేర్కొన్నారు. ఏఎన్‌యూలో నాగార్జున యూనివర్సిటీలో సచ్చిదానంద మూర్తి గారి పేరిట ప్రొఫెసర్ సచ్చిదానంద మూర్తి సెంటర్ ఫర్ స్టడీస్ ఇన్ ఆఫ్రో-ఏషియన్ ఫిలాసఫీ పేరుతో తత్వ శాస్త్ర కేంద్రాన్ని ఏర్పాటు చేయడం సంతోషకరమన్నారు. నేటి తరం విద్యార్థులు శ్రీ కొత్త సచ్చిదానందమూర్తి గారిని స్ఫూర్తిగా తీసుకోవాలని సూచించారు.
కార్యక్రమంలో శాసనసభ్యులు మండలి బుద్ధ ప్రసాద్, కామినేని శ్రీనివాసరావు, నాగార్జున యూనివర్సిటీ వైస్ ఛాన్సలర్ ప్రొ. కె గంగాధర్ రావు, ప్రొ ఎం త్రిమూర్తి రావు, ప్రొ అశోక్ వోహ్రా, ప్రొ కేఎస్ చలం, ప్రొ కె రత్నషీలామణి, ప్రొ ఎన్వీ కృష్ణారావు, ప్రొ జి సింహాచలం తదితరులు పాల్గొన్నారు.
